Вольга Базылёва
Новыя вершы
*
Мяне амаль няма.
І ў гэтым шэрым свеце -
У мой апошні дзень -
Звініць апошні вецер,
Жабруе па дамах
І, стукаючы ў шыбы,
У зморшчаных руках,
Працягнутых для крыўды,
Нясе глыток віна
З кіслінкай развітання.
Мяне амаль няма.
Усё амаль звычайна -
У неспакойных снах.
*
І дождж спяшаецца амыць душу,
Нядужную палонніцу спякоты.
Я азірацца болей не хачу
І ўсё ж аднойчы азірнуся ўпотай…
Я поўню нашай стрэчы патушу.
У спадзяванні, што душа не з’ёлкла,
Сляпую ноч таропка дажыву,
А на дасвецці - уздыхну з палёгкай,
У росах астудзіўшы галаву.
Дастану з шафы крылы.
Буду лётаць…
*
Хадзілі па небе,
Запальвалі зоркі...
Я і ты.
А нехта нашэптваў:
"Зоркі пагорклі,
Зоркі рассыпаліся на дым".
Ну, што ж, няхай
Палыновая зорка,
Горкая зорка жыве.
Толькі б не адчужэнне,
Не сорам,
Не асалодны здзек.
Горкая зорка
Далонь апякае –
Я дацярплю, зберагу.
Будзе здавацца:
Душа нямая,
Будзе балець, што не давяраю, –
Проста вазьмі за руку.
*
Па ночы маладзік
Спяшаўся нацянькі
Ад вечара да раніцы,
А з кім
Вяла размову я?
Здараецца,
Не ўспомніць нават позірку,
Не ўспомніць
Свайго адбітку...
У вачах насупраць.
Поцемкі –
І нас ужо няма.
Сумна...
Апошні май
У годзе.
*
Калі паўзе кузюрка па траве,
Па высахлай былінцы танканогай,
А я, стаіўшыся пад нізкім небам,
Сачу за ёю, супыняю подых;
Калі са свежай драпіны
Дзве кроплі
Крыві
Спяшаюцца знайсці зямлю,
Але лісток трыпутніка знаходзяць –
Зямныя сокі гояць драпіны душы.
І хто б саказаў, што я не разумею,
І хто б сказаў, што гэта несур'ёзна!
А я ніколі не пайду назад...
Я ведаю, я веру, я жыву...
Магчыма, я кахаю!..
*
Калі над цяпельцам
Схіляюцца зоркі,
Я грэю далоні, як ліст, дрыжучы,
А дрэвы адмерваюць цемру высока
І стоена вецер у лісці маўчыць.
Ты – цень ля цяпельца,
Ты – дрогкае сэрца,
Ты – мной адшуканы няўлоўны пагляд.
І восень...
Таксама прысела пагрэцца
Ля вогнішча, што запаліў лістапад.
Чырвонае лісце
Згарэла, імгліцца,
І блізкія зоркі ўкрывае туман.
Аслаблыя пырскі.
Апошнія знічкі.
А мне б твае рукі ў сваіх
Затрымаць...
*
Сыграны першы такт
Апошняга імгнення.
Запознены ліхтар
Раскінуў святлацені.
Даверліва ў далонь
Прыселі дзве сняжынкі
Й патрапілі ў палон.
Расталі – і прывыклі...
Дзве кропелькі вады
Сцяклі таропка з пальцаў.
Цяжкі адліжны дым
Рассеўся на асфальце.
Зіму не пазнаю!
Мароз. Зырчэюць зоры.
Зялёную траву
Апанавала змора.
Імклівы лістапад
Трасе пасохлым лісцем.
Азябла шэпча сад:
"Да сэрца прытуліце!.."
*
У прагорклай вадзе
Ціхай сажалкі
Патанала хвіліннае шчасце.
Расціскала пальцы
І падала
Лісце ў журботным танцы.
Дыхалі грудзі
Туманным вечарам,
А вочы жылі цяпельцам,
І толькі нагам,
Без пары знявечаным,
Здавалася: сцежка парвецца.
На досвітку
Цені зрабіліся светлымі;
Я памыла ў вадзе далоні.
Дрэвы стаялі
Нерухомымі сведкамі
Нараджэння інакшага СЁННЯ.
*
Хочаш кавы? –
Выпі кубак ночы.
Забываю
Плакаць толькі моўчкі.
Солена –
А ўсё адно салодка.
Колькі нам
З табой быць паасобку?
Гавару –
Няма каму паслухаць.
Стрэча рук –
Паслуга за паслугу.
Ты і я –
Зімы нямыя цені.
Першы збой:
Мне крылы – для падзення.
Хочаш ночы? –
Выпі кубак кавы.
Вуснаў хочаш?
Толькі будзь ласкавым...
*
Сіні тралейбус
Прыснуў на прыпынку.
Лёгкі марозік.
Рыпяць чаравікі,
І я, пад пахай
Трымаючы кнігу,
Проста дахаты
Па снезе іду.
Вецер прыслухаўся,
Вецер стаіўся.
Тонкія цені,
Ліхтарныя пырскі.
Той, хто сляды
Пакідаў тут калісьці,
Пэўна ўжо дома
І грэе ваду,
Хутка заварыць
У кубку гарбату
З чорнай парэчкі,
Рамонкаў і мяты.
Я паспяшаю
Па снезе дахаты,
Быццам там
Нехта чакае даўно.
Толькі па снезе –
Няёмка і слізка,
А ў косы поўні
Зоркі ўпляліся.
Той, хто ўжо дома,
Гарбаты напіўся.
Лёгкі марозік.
Зімовая ноч.
Я абмінаю
Сумёты й самоту,
Я зазіраю
Ў вокны... употай,
Я толькі ў вочы
Гляджу неахвотна:
Боязна мне,
Што свае застужу.
Той, хто ўжо дома,
Заснуў у пакоі,
Б'ецца дыханне яго
Трапяткое,
Але на кухні
Пакінуў святло ён,
Як я дахаты прыйду –
Патушу.
*
На апошняй лужыне асенняй –
Павуцінне льду.
Вечар кінуў мне пад ногі цень мой –
Я па ім іду,
А наўкол стаяць прывіды-гмахі,
Горад трызніць сном.
Як адолець холад тонкіх пальцаў
Ветру?
Мо, агнём?
Данясу да скрыжавання свечку,
Каб паваражыць:
Той, хто змерзне першы ў гэты вечар,
Доўга будзе жыць...
Восень як пажоўклую старонку
Самай вечнай з кніг,
Дачытаўшы, без ваганняў доўгіх,
Я спалю ў агні.
Прынясе іскрынку ачышчэння
Гэта ноч на свет:
Па апошняй лужыне асенняй
Пройдзе першы снег.
*
Без цябе мне было ўчора
Горка –
Я цукерку ўзяла
Пад язык.
Ціха плакала на панадворку
Завіруха,
Прабабка адліг.
Я твой голас чула –
У ветры,
Ты паклікаў бы,
Я пайшла б.
Разматала зіма кіламетры
Ледзянога крохкага шкла.
Патыхала цяплом
Ад пледа,
Не хавала я зябкіх плячэй.
Быў ты ўчора адзін
І не ведаў:
Мне з цукеркай
Яшчэ гарчэй...
12 снежня
Час прачынацца:
Праменьчык казыча
Павекі.
Быццам у казцы,
На вулках –
Малочныя рэкі.
Свежая раніца.
Тонкая шэрань
На вецці.
Снежань і пятніца,
І на гадзінніку –
Дзевяць.
Недзе за вокнамі
Мякка ступаюць
Трамваі,
А я пад коўдраю
Ранішні сон
Дасынаю.
Час прачынацца.
Сцюдзёным паветрам
Пакоя
Хуценька
Вымыю вочы
Ад мараў і мрояў.
Лапінку неба
Знайду
Пад гарачай падушкай.
Пятніца. Снежань.
У дзевяць
Прачнулася птушкай.
*
Там, дзе сцены помняць дотык
Маіх позіркаў і рук,
Я зніму з сябе турботы
І – у шафу прыбяру.
Запалю старую лямпу
І з гары папер і кніг
Выцягну сузор'яў мапу,
Каб уночы іх прысніць.
За акном дождж сыпле крошкай,
І, нябачны, у кутку
Лічыць часавыя крокі
Мой гадзіннік да "ку-ку".
Ліпнуць вейкі. Глухнуць гукі.
Вечар ходзіць па вадзе.
На бясконцых мокрых вулках
Не сустрэць яму людзей.
Глухнуць гукі. Ліпнуць вейкі.
Разгарнула кніжку сноў.
Шыйкі выцягнулі кветкі:
Ім сузор'яў не відно...
*
Я веру, што недзе там,
Дзе кропка
Спыняе сказ,
Не хопіць словаў радкам,
Каб выказацца за нас.
І мы, з асалодай сяброў,
Усё ж патрывожым
Пыл
На кнігах няспраўджаных мрой,
На кнігах скалечаных крыл.
Нальецца са скроняў боль
Ва ўсе закуткі душы.
Напісанае табой
У стосах,
У шафах ляжыць.
Шматкроп'е сваё адмаўчыць,
І новы пачнецца сказ.
У лабірынтах паліц
Словы
Не выкажуць нас...
*
Я сёння сама не свая,
Згубіла светлы настрой
І выпадковага вераб'я
Накарміла тваім бутэрбродам.
Памылковы рэбус:
Ты + Я.
Я побач з табой?
Ну, толькі што ў навальніцу,
У непагоду!
Пад адным парасонам у галаву –
І ў тваю, і ў маю –
Прыходзяць тыя ж самыя думкі,
А сёння сонца –
Значыць я слёзы лью,
А ты смяешся –
Сварымся...
Да першага пацалунку.
© Вольга Базылёва, 2004.